İşğalciler Rusiye tarafından ilhaq etilgen Sudaqnıñ Kapsel körfezindeki iş adamlarınıñ yerlerini çekip alalar.
Bu aqta Qırım.Aqiqatqa yerli bir faal ikâte etip bergen.
Neşir telükesizlik noqta-i nazarından onıñ adını bildirmey, çünki o artıq basqıncılar tarafından repressiyalarğa oğratılğan.
Yerli iş adamları Meganom civarındaki Kapsel körfezinde olıp bitkenlerge menim diqqatımnı çekti. İş adamlarınıñ ekseriyeti 50 yıllıq kira muqavelesi tizgen. Lâkin olarnıñ kafe ve tükânlarını yıqıp, çalışmağa imkân bermeyler. Tamam sahilde, “Suv kodeksi”ne baqmadan yañı sahipleriniñ ilerideki qurulacaq kafe ve restoranları içün temel atalar. İnsafsız bir şekilde Meganom burnunıñ qoruqlıq tabiatı ğayıp etile, – dep qayd ete o.
Faalniñ sözlerine köre, bularnıñ episi körfez topraqları üzerinde miqyaslı qurucılıq yapqan “Tavrida” art-klaster yolbaşçılarınıñ qol tutuvı ile yapılmaqta.
Daa evel haber etilgeni kibi, Rusiye tarafından ilhaq etilgen Qırım ehalisiniñ sayısı doquz yıl içinde esasen Rusiyeden kelgenler esabına bayğı arttı.
