Fevral ayı devamında rusiyeliler tarafından ilhaq etilgen Qırımda 5 kişi nezaret altına alınğan, 12-si tevqif etilgen, 8 kişi sorğulanğan ve subetleşmek içün çağırılğan.
Bu aqta Qırımtatar Resurs Merkezi (QRM) haber ete.
Teşkilâtnıñ malümatına köre, esabat müddeti içinde 5 kişi nezaret altına alınğan, 12-si tevqif etilgen, 8 kişi sorğulanğan ya da subetleşmek içün çağırılğan. 19 kere adaletli mahkeme talap etüv aqqı qayd etilgen. 4 sefer yüksek seviyedeki cismiy ve psihologik sağlıq aqqı bozulğanı aqqında malüm, – denilmekte haberde.
2014 senesindeki ilhaqtan başlap rusiyeliler Ukraina tarafdarı olğan yarımada sakinlerine sistematik sürette basqı yapmağa devam etkenleri aqqında hatırlatamız. Basqıncılar faallerni qapay, olarnıñ evlerinde tintüv ötkere, hırsızlay, aqlarından mahrum ete ve ilâhre.
