Qırımtatar halq Meclisiniñ reisi Refat Çubarov, yarımada azat etilgenini beklemeyip, Qırım muhtariyetiniñ mundericesi aqqında qonuşmağa vaqıt keldi dep saymaqta.
Bu aqta o “Qırım 2014 vs Qırım 2023” adı altında Ukrain buhranlar media-merkezinde (UBMM) ötkerilgen kütleviy muzakere esnasında ayttı dep bildire UBMM.
Artıq bizler bu topraqnıñ tamır halqı bar degen meseleni añlamadan keçip olamaymız. Qırımtatar halqınıñ saqlanıp qaluvı ile inkişaf etüvini teminleycek imkânlar berilmeli, çünki onıñ Ukraina tışında başqa toprağı ya da etnik ceetten yaqın olğan devleti yoq. Bunen beraber er keske musaviy aqlar tanılmalı, – dep ayta Meclis reisi.
Azat etilgen Qırımnıñ inkişafınıñ temeline qoyulacaq esas printsipni Çubarov aşağıdaki şekilde köre: Ukraina devleti qırımtatarlarnı da qayğırmalı, qırımtatarlar diger vatandaşlarnen beraber Ukraina devletini qayğırmaq kerek.
QIRIM.News haber etkeni kibi, daa evel Refat Çubarov Ukraina erkânındaki Milliy-territorial muhtariyet ne şekilde olmaq kerekligi aqqında ikâye etip bergen edi.
